לאנדאן יצ"ו
ביקור קודש – צווייטן טאג
יום ג' פ' תולדות העעל"ט
נעכטן דינסטאג אינדערפרי האט מרן רבינו שליט"א געדאווענט שחרית אין ביהמ"ד הגדול אינאיינעם מיט די תלמידי התלמוד תורה פון כיתות ד' און העכער, ווי דער רבי שליט"א האט געלייגט תפילין פאר הב' חתן הבר מצוה בן מוה"ר יצחק יוסף פריעדמאן הי"ו פון לאנדאן.
נאכ'ן דאווענען זענען אלע איבריגע כיתות אויך אריבערגעקומען אין ביהמ"ד הגדול ווי עס איז פאהרגעקומען א מסיבה מיט אלע תשב"ר תלמידי הת"ת, ווי עס האט זיך אנטפלעקט א מחזה הוד זעענד'יג אלע תלמידי הת"ת אויסגעשורה'ט אויפן גאנצן לענג און ברייט פונע'ם היכל ביהמ"ד הגדול.
אויך זענען אנוועזענד געווען ביי דער מסיבה די ראשי הקהלה און די דייני ורבני הקהלה, חברי הנהלת המוסדות, און דער נייער רב שליט"א, און נאך.
געעפענט דעם מעמד האט דער מנהל הת"ת הר"ר משה פעלבערבוים שליט"א, וועלכער האט בשם די קינדער מקבל פנים געווען דעם רבי'ן שליט"א, און האט איבערגעגעבן פאר'ן רבי'ן שליט"א א מתנה וואס די חשובע תלמידי הת"ת האבן צוגעשטעלט לכבוד דעם רבי'ן שליט"א'ס ביקור קודש ביי זיי אין די שטאט, 2-טויזענט-הונדערט-איין-אין-פופציג (2151) שעות רצופות, וואס די קינדער האבן געלערנט אין די לעצטע אנדערהאלבן וואך – זייט עס איז באשטימט געווארען אז דער רבי שליט"א וועט אי"ה ערשיינען אויף א ביקור קודש בתוככי עיר לאנדאן.
גאהר קענטיג איז געווען דער קורת רוח וואס די הערליכע מתנה האט געשאפן פאר מרן רבינו הגה"ק שליט"א, וועלכער האט איבערגענומען די רשימה פונעם מנהל און דורכגעקוקט בפרטיות מיט א גרויס התרגשות.
דאן האט דער מנהל הת"ת אויסגערופן דעם רב שליט"א צו קומען רעדן פאר די קינדער לכבוד אט דעם גרויסן געלעגנהייט.
דער רב שליט"א האט געזאגט א שיינע דרשה און האט ערווענט פאר די קינדער אז די תלמידים דארפן האבן גרויס הכרת הטוב פאר'ן רבי'ן שליט"א וועלכער זארגט זיך כסדר פאר זיי, און דער ריכטיגער הכרת הטוב וועט זיין ווען צום סוף זמן הלימודים וועלן זיך די קינדער אי"ה פארהערן די לימודים.
דאן האבן די קינדער געזינגען ספעציעל שיינע פארפאסטע חרוזים לכבוד מרן רבינו שליט"א, און דערנאך האבן די קינדער זוכה געווען צו הערן דברות קודש פון רבי'ן זאל זיין געזונט.
דער רבי שליט"א האט ארומגערעדט צו די קינדער דברי מוסר און בתוך הדברים שטארק ערווענט די מידת האמת וואס עס איז זייער וויכטיג אז מען זאל זיך איינגעוויינען פון קינדווייז אהן, אזוי ווי מיר פלעגן כסדר הערן פון מרן רביה"ק בעל ברך משה זי"ע.
נאך די לענגערע דברות קודש האט דער רבי שליט"א אויסגעטיילט מתנות פאר די קינדער, די אינגערע קינדער האבן ערהאלטן א סידור, און די עלטערע קינדער האבן ערהאלטן א ספר משלי מיט טייטש.
מיט א שטארקע התעוררות און קבלה אויף ווייטער האבן זיך די קינדער געלאזט אין חדר אריין נאך אזא געהויבענע און התרגשות'דיגע מעמד מיט'ן רבי'ן שליט"א.
באזוכן ביי רבני העיר שליט"א און אין די בניני המוסדות
אין די מיטאג שטונדן האט דער רבי שליט"א אפגעשטאהט א באזוך ביי הרה"ג ר' ארי' ווייס שליט"א רב דביהמ"ד וויזניץ-ב"ב אין לאנדאן, און דאן ביי ש"ב הרה"ג ר' דוד האגער שליט"א רב דביהמ"ד וויזניץ-מאנסי.
פון דארט איז דער רבי שליט"א אריבער אויף א גאהר קורצע באזוך אין די בנין הבית רחל, און אויפן וועג ארויס האט דער רבי שליט"א געבענשט מטבעות וועלכער ער האט איבערגעגעבן פאר הרה"ח ר' יוסף אייזיק לעוו הי"ו יו"ר ההנהלה פון די בית רחל, וועלכער מען האט שפעטער אויסגעטיילט פאר די תלמידות.
נאכ'ן באזוך אין די מיידל סקול איז דער רבי שליט"א אריבער אויף א באזוך בבית הרה"ג ר' ישראל אלימלך לייזער שליט"א רב דק' פשעווארסק אין לאנדאן, זוהן פון האדמו"ר מ'פשעווארסק שליט"א, און דערנאך האט דער רבי שליט"א באזוכט ש"ב הרה"ג ר' יצחק באב"ד אבד"ק טארטיקוב שליט"א ווי עס האט זיך פארצויגן א שיינע שמועס וועגן די אבות המשפחה און זייערע זיידע'ס למעלה בקודש.
דאן איז דער רבי שליט"א געגאנגען באזוכן הגה"צ רב דקהלתינו שליט"א, און דערנאך ביי הרה"ג ר' שלום פריעדמאן שליט"א דומ"ץ התאחדות הקהילות חרדים, ווי עס איז פארצויגן געווארן א שיינער שמועס איבער עניני שחיטה און נאך.
פון דארט איז דער רבי שליט"א געגאנגען באזוכן הרה"ג ר' אהרן דוד דוננער שליט"א ראב"ד לאנדאן ווי עס איז פארצויגן געווארן א שיינער שמועס און דערנאך האט דער ראב"ד שליט"א געבעטן דעם רבי'ן צו קומען לייגן אן אבן הפינה ביי די נייע מקוה טהרה וואס גייט אי"ה אצינד געבויעט ווערן אין די שטאט תחת השגחתו.
דערנאך איז דער רבי שליט"א אריבער צום בנין התלמוד תורה ווי דער רבי שליט"א איז ארום אין די חדרים און פארהערט אין יעדן כיתה באזונדער און קענטיג געשפעט נחת דקדושה פון די צאן קדשים.
נאכ'ן ארומגיין אינעם בנין איז דער רבי שליט"א ארויס צום שטח ווי עס גייט אצינד אהן די העפטיגע פלאנירונגען צום נייעם בנין הת"ת וואס גייט אי"ה בקרוב געבויעט ווערן אויפן ארט, און הר"ר אליזער לעוו הי"ו זוהן פון ר' ישעי' וואלף הי"ו ראה"ק, וועלכער גיט זיך שטארק אוועק אצינד פאר די בוי פלאנירונגען, האט איבערגעגעבן פאר'ן רבי'ן שליט"א א פונקטליכער באריכט איבער די בוי פלענער.
באלד דערנאך איז דער רבי שליט"א געגאנגען צום ביהמ"ד סטאניסלאוו ווי די כיתות פון ט' און י' זענען אצינד פלאצירט, ווי דער רבי שליט"א האט משמיע געווען דברות קודש פאר די בחורי חמד, און דערנאך געדאווענט מנחה מיט די בחורים.
נאך מנחה איז דער רבי שליט"א געגאנגען אויף א באזוך ביי הרה"ג ר' זאב פעלדמאן שליט"א רב דקהל עץ חיים ווי עס איז פארצויגן געווארן א שמועס איבער'ן ענין וואס דער רבי שליט"א האט ערווענט ביי די משא הקודש א טאג בעפאר ביים גרויסן מעמד הכתרה אז די איכות איז איבער די כמות און דאס איז דער עיקר, ווי דער חשובע'ר רב שליט"א האט געברענגט כמה ראיות דערצו פון פארשידענע סגיות.
פון דארט איז מרן רבינו שליט"א אריבער באזוכן הגה"צ ר' שמואל בנימין קרויס שליט"א ווי עס איז געווען א גאהר ידידות'יגער שמועס בדברי תורה און נאך, און נאך דעם באזוך איז דער רבי שליט"א געווען באזוכן הרה"ג ר' יוסף פאדווא שליט"א דומ"ץ התאחדות הקהילות חרדים און רב השחיטה כדתיא, ווי עס איז פארצויגן געווארן א שמועס בעניני שחיטה איבער וואס דער דיין שליט"א איז ממונה אין לאנדאן.
התמנות דומ"ץ דקהלתינו לאנדאן
אין די נאכמיטאג שטונדן איז אין רבין'ס אכסניא פאהרגעקומען א התרגשות'דיגער מעמד, ווי דער רבי שליט"א אינאיינעם מיט די טובי הקהל האבן ממנה געווען הרה"ג ר' שמעי' לעוו שליט"א זוהן פון הרבני הנגיד מוה"ר ישעי' וואלף הי"ו ראה"ק דקהלתינו, אלס דומ"ץ דקהלתינו אין לאנדאן.
נאכדעם וואס אלע טובי הקהל האבן געחתמ'ט דעם שטר התמנות האט דער רבי שליט"א און אויך דער רב שליט"א געחתמ'ט, און דערנאך האט הרה"ח ר' ישראל יעקב פרענקל הי"ו – מטובי הקהל פאהרגעליינט דעם שטר התמנות, און דאן האט מען געטרינקן לחיים און דער רבי שליט"א האט ווארעם אנגעוואונטשן ברכת קדשו פאר'ן דיין שליט"א און אלע ראשי הקהלה.
דאן האט אויפגעטרעטן דער נייער דיין שליט"א און דערנאך דער רב שליט"א וועלכער האט שטארק ארומגערעדט בשבח פונעם דיין שליט"א אז אין די קורצע פאהר וואכן וואס ער האט אים קענען גלערענט האט ער שטארק מפליא געווען זיינע געוואלדיגע מעלות, און וואס פארא גדול בתורה ער איז.
דאן האט דער רבי שליט"א משמיע געווען דברות קודש לכבוד דעם געלעגנהייט. דער רבי האט אויך שטארק ערווענט בשבחו פונעם דיין, און אזוי אויך ערווענט וואספארא גרויסע טאג עס איז פאר'ן פאטער פון דיין הרה"ח ר' ישעי' וואלף הי"ו אז ער האט דער זכי' צו זעהן אזא נחת ביי זיינע חשוב'ע קינדער.
אסיפות מיט די הנהלת המוסדות
נאכ'ן מסיבת לחיים זענען די חברי הנהלת רוחניות און גשמיות פון די בית רחל געקומען צום רבי'ן שליט"א אויף א אסיפה איבערצורעדן פארשידענע נושאים ווי דער רבי שליט"א האט זיך שטארק פאראינטרעסירט אויף אלע פרטים פונעם בית חינוך לבנות.
דאן איז פאהרגעקומען אן אסיפת מלמדים מיט אלע מלמדים פון די תלמוד תורה, ווי דער רבי שליט"א האט זיי משמיע געווען דברי הדרכה אין זייער עבודת הקודש. נאך די אסיפה איז געווען א ספעציעלע געלעגנהייט פאר די מלמדים אריינצוגיין אל הקודש פנימה להתברך בפו"פ.
דאן האט זיך אנגעהויבן זמני כניסה פאר אנ"ש תושבי לאנדאן וואס האט זיך פארצויגן פאר לענגערע שעות, ביז ארום 2:30 אויפדערנאכט.
ביי די זמני כניסה איז געווען א געלגענהייט פאר אנ"ש תורם צו זיין פאר'ן נייעם ביהמ"ד דקהלתינו אין לאנדאן אויף היטלענד ראוד, וואס ביי דער מעמד הכתרה האט עס מרן רבינו שליט"א קורא שם געווען לשמו ולזכרו פונע'ם פעטער מרן רביה"ק זי"ע "ויואל משה", און מען האט געקענט אריינטראגן די נדבות פערזענליך איבערצוגעבן לידי קדשו פון מרן רבינו שליט"א און ערהאלטן פון רבי'ן א לעדערנע תפילה ישרה סידור מיט חתי"ק פון רבי'ן שליט"א.
עס איז שוין געווען נאך 2:30 אויפדערנאכט ווען דער רבי שליט"א איז אריבער אין שטוב פון העסקן מוה"ר יואל שעהר הי"ו ווי דער רבי שליט"א האט געשריבן אן אות לגומרה של תורה אינעם ספר תורה וואס ווערט אי"ה היינט אריינגעגעבן אין ביהמ"ד הגדול אין לאנדאן לע"נ אביו מרן רביה"ק זי"ע,.
נאך די כתיבת ספר תורה איז דער רבי שליט"א – אויפן פערזענליכן רוף פון הרה"ג ראב"ד לאנדאן שליט"א – אריבער צו די ארט ווי מען גייט אי"ה בויען א נייע מקוה טהרה, און דארט געלייגט דעם גרונד שטיין, און אויפן ארט אז פארמירט געווארן א שיינער שמועס מיט הרה"ג ראב"ד לאנדאן שליט"א בהלכות ועניני מקוואות.
♦♦♦
ביקור קודש – דריטן טאג
יום ד' פ' תולדות - אינדערפרי
היינט אינדערפרי האט דער רבי שליט"א געדאווענט שחרית אין ביהמ"ד הגדול מיט די תלמידי הת"ת פון כיתה ז' און העכער, ווי דער רבי שליט"א האט געלייגט תפילין פאר הב' חתן הבר מצוה בן הרבני הנגיד ר' ירמי' קאהן הי"ו פון גאלדעס גרין.
נאכ'ן דאווענען איז דער רבי שליט"א אריבער באזוכן דעם פלייש באנק דקהלתינו הק' אין לאנדאן, ווי דער רבי האט א לענגערע צייט אבזערווירט אלע פרטים אינעם געשפעט און געגעבן פונקטליכע אנווייזונגען אויף די חלק הניקור וויאזוי עס דארף געטוהן צו ווערן.
מיט די באריכטן פון איבער'ן טאג וועלן מיר אי"ה ממשיך זיין.
♦♦♦
הכנסת ספר תורה
לע"נ מרן רביה"ק בעל ברך משה זי"ע
א יום טוב'דיגע שטימונג הערשט אצינד אין לאנדאן מיט די לעצטע הכנות צום גראנדיעזן מעמד הכנסת ספר תורה וואס איז געשריבן געווארן דורך בני קהלתינו הי"ו פוןן לאנדאן לע"נ מרן רביה"ק בעל ברך משה זי"ע, און וועט אי"ה היינט אריינגעגעבן ווערן אין ביהמ"ד הגדול בראשות כ"ק מרן רבינו שליט"א.
-שושו ושמחו בשמחת התורה-
♦♦♦
>
>
