אדוני נ"י, איך האב נישט קיין פראבלעם צו גיין ווייטער בעזהשי"ת לויט ווי דיר שמעקט, אבער איך מוז קלארשטעלן צוויי נקודות:
1) דאס איז דערווייל נישט קיין "דיאלאג", נאר א איינזייטיגער "אינטערוויו", (באמת וואלט איך געוואלט הערן דעם צווייטן צד אויך).
2) איך בין נישט קיין ספאוקסמאן און איך טוה נישט פארטרעטן נט"ק אין דעם אינטערוויו, אמת דאס איך בין א שטארקער נט"ק "סימפאטיקער", אבער נישט זייער "פארטרעטער", און איך וועל פראבירן לויט מיין פארשטאנד צו ענטפערן די שאלות אי"ה אויפן בעסטן אופן.
יעצט וועלן מיר זיך נעמען צו די פראגעס:
לאמיר אצינד אריבערגיין צו די אראבער זעלבסט (דארט ווי איך שרייב אז איר זאלט אויסקלויבן "נאר" איינע פון די אפציעס, ביטע צייכנט עס בלויז אן ביים נאמען, אן קיין איבעריגע הסברים):
געדענק: די שו"ת (אפילו אין פאל אז איר ענטפערט נישט) וועט איבערגעזעצט ווערן אין די ענגלישע שפראך, וואו מיליאנען גוים וועלן עס ליינען:
א) וואס איז אייער מיינונג איבער די מוסלומעינער רעליגיע בכלליות? (ביטע אויסקלויבן "נאר" איינע פון די אפציעס)
1) זייער חשוב און פיין 2) פאזעטיוו 3) נישט גוט און נישט שלעכט 4) פון איין זייט גוט און פון דער אנדערע זייט שלעכט 5) שלעכט 6)ימח שמם וזכרם - אויסגעריסן זאלן זיי ווערן 7) קען נישט זיין ערגער.
קיין איינס פון די אפציעס (זעה מיין תשובה אויף פראגע ד').
ב) אויב האט א איד א ברירה, אדער צו זיין א איד - א ציוני וואס גלויבט אין אתחלתא דגאולה און אין שלימות הארץ, אדער צו זיין א גלויביגער מוסלומענער, וואס זאל ער ענדערש טון? (וועל אויס איינע פון די צוויי אפציעס)
1) איד 2 ) מוסלומענער
קיין איינס פון די אפציעס (זעה מיין תשובה אויף פראגע ג').
ג) אויף שאלה ב'; ביטע מסביר זיין פארוואס (אין א קורצע זאץ, ווייניגער פון פינף שירות):
א יוד האט נאר איין איינציגע אפציע: צו זיין הונדערט פערצענט געטריי צו דת משה וישראל אן קיין שום פשרות.
אבער עס איז בלתי שום ספק אז ס'איז קיין פארגלייך, איינער וואס איז א מאמין בהשי"ת ובנבואת משרע"ה, נאר ער איז זיך טועה אין ענין פון מצות ישוב אר"י, אדער אין סדר הגאולה, און האלט בטעות אז מען מעג פירן קריגעריי מיט די גוים נגד התורה, (צוליב זיינע פארדרייטע רבי'ס און פאלשע שיטות) צו איינעם וועלכער איז א משומד וואס האט אינגאנצן איבערגעלאזט דעם יודישען גלויבונג.
ד) וואס איז דיין מיינונג איבער מוחמד? (ביטע אויסקלויבן "נאר" פון די אפציעס - איר קענט אויך אויסקלייבן עטליכע אפציעס):
1) זייער פאזעטיוו 2) למעשה האט ער אויפגעטאן פיל פאר די מענטשהייט און פאר מענטשן ארום די וועלט 3) א נארמאלער פיינער מענטש 4) א שוטה 5) א שוטה און רוצח 5) א שטיק קליפה וואס האט אראפגעברענגט א טמאה אויף דער וועלט, אויסער דעם וואס ער איז געווען א שוטה און רוצח.
אפציע נומער 2 - (באזירט אויך די הייליגע ווערטער פון רמב"ם - זעה שאלה ה').
ה) אויף שאלה ד'; זיי קלארער מסביר דיין שטעלונג (אין א קורצע זאץ, ווייניגער פון פינף שורות).
איך קען נאר מעתיק זיין דעם לשון פון הייליגן רמב"ם, וואס ער זאגט אויף מוחמד און איסלאם אז דאס האט השי"ת צוגעלאזט, כדאי אוועק-צונעמען די גוים פון כפירה און ע"ז און אנגרייטן די וועלט צום זמן פון משיח, וזה לשון קדשו:
(הל' מלכים פ' י"א – דפוס שבתי פרנקל) אבל מחשבות בורא עולם אין כוח באדם להשיגם, כי לא דרכינו דרכיו ולא מחשבותינו מחשבותיו. וכל הדברים האלו של ישוע הנוצרי, ושל זה הישמעאלי שעמד אחריו, אינן אלא ליישר דרך למלך המשיח, ולתקן את העולם כולו לעבוד את ה' ביחד: שנאמר "כי אז אהפוך אל עמים, שפה ברורה, לקרוא כולם בשם ה', ולעובדו שכם אחד" (צפני' ג', ט').
ו) לאמיר אריבערגיין צו ימות המשיח: ווען משיח וועט קומען, וואס וועט געשען דעמאלס מיט די אראבער?
מען דארף נישט מער פונעם פסוק אין צפני' וואס דער פריער-דערמאנטער רמב"ם ברענגט: "כי אז אהפוך אל עמים, שפה ברורה, לקרוא כולם בשם ה', ולעובדו שכם אחד" ( צפני' ג' ,ט'). – אלע אראבער, אמעריקאנער, פראנצויזען, טערקען, איראנער, בראזיליאנער, רומענער, אא"וו, וועלן דינען השי"ת מיט אחדות.
ז) וועלן דאן די אראבער בלייבן אין ארץ-ישראל, אדער וועט מען זיי ארויסווארפן?
ווען משיח וועט קומען וועלן אלע באשעפענישן (ובתוכם די אראבער) זיין איין גרויס פאלק וואס דינט השי"ת, די גאנצע וועלט וועט האבן קדושת ארץ ישראל, ויעשו כולם אגודה אחת לעשות רצונו בלבב שלם, כי לך תכרע כל ברך תשבע כל לשון, לתקן עולם במלכות ש-ד-י, וישמעו רחוקים ויבואו ויתנו לך כתר מלוכה.
ח) וואס וועט מען טון מיט זייער מעטשעט אויפן הר-הבית? - וועט מען עס חרוב מאכן? - ארויסטרייבן די אראבער פון דארט? - הרג'ענען? - וואס פונקטליך.
אויפן הר הבית וועט אראפקומען פון הימל דער ביהמ"ק השלישי בנוי ומשוכלל, און אלע גוים (ובתוכם די אראבער) וועלן אנערקענען אז דאס איז דעם באשעפערס הויז, און זיי וועלן דארטן קומען מתפלל זיין, ווי דער נביא זאגט (ישעי' נ"ו) כי ביתי בית תפלה יקרא לכל העמים. – פונקטליך וויאזוי ס'וועט צוגיין וועלן מיר אי"ה בקרוב געוואויר ווערן.