אזויווי מען קען שוין זאגן פרעזידענט עלעקט באראק אבאמא, דארף מען נישט ווארטן אויפן טיים און ניוסוויק פון מיטוואך אינדערפרי צו אפשאצן דער געווינער און פארלירער.
ראש וראשון, ס'איז נישט קיין סוד אז מקעין האט געפירט גאר גאר א שלעכטן קאמפיין, מיר האלטן שוין 08' למס', און מר. מקעין האט געפירט אזא דורכגעפאלענע קאמפיין וואס מ'האט שוין נישט געזעהן יאר'ן. נאך די וואלן וועלן אוודאי ארויסקומען אז די קאמפיין סטעף האבן זיך ארומגעקריגט מיט די הענט און פיס.
מקעין האט געהאט א הויפן מיט מעכטיגע אמונאציע, אמונאציע וואס יעדער פאליטישאן וואלט זיך באלעקט די פינגער נאר צו טראכטן דערפון, אנשטאט דאס צו נוצן, האט ער דאס געלאזט פארדזשאוועט ווערן, און ווען ער האט דאס שוין יא געוואלט אנפאנגען ניצן איז דאס געווען אזוי "ראסטיג" אז עס האט אים געהאלפן אויף כפרות.
צווייטענס, באראק אבאמא האט געפירט א געלונגענעם קאמפיין וואס מען האט נאך קיינמאל געזעהן, יארן וועט נאך געדויערן אפצושאצן ווי מעכטיג דער אבאמא קאפיין איז געפירט געווארן, אזוי שנעל און אזוי גוט אפצוענטפערן יעדע איינציגסטע אטאקע. נישט צום גלייבן ווי א גוטע קאמפיין קען אלס אנקומען.
ואחרון אחרון חביב, די מידיא, די מידיא האט גענומען אזא איינזייטיגקייט אינעם קאמפיין ווי קיינמאל בעפאר, א זאך וואס מען קען נישט באגרייפן אין די היינטיגע פרייע וועלט.
וויאזוי פרעזידענט אבאמא וועט פירן אמעריקע קען מען נישט פאראויס זאגן, מ'קען גלייבן אז ער וועט האבן די זעלבע אויסערן פאליטיק פאליסיס ווי די געוועזענע פרעזידענטן קלינטאן און קארטער וועלעכע האבן ביידע איבערגאלזט א שווערע ארבעט פאר זייער נאכפאלגער.
ביז דערווייל גרייט מען זיך שוין צום 12' פארמעסט, מיט ראמני איז לכאורה דער שטערקסטער קאנדידאט, מען שפעקולירט צו מרס. פעילין וועט אויך לויפן, נאכדעם וואס די מידיא האט איר שוין ערלעדיגט, מעגליך אויף אייביג.
וואס זיכער איז זיכער: ס'איז משיח'ס צייטן.