פילע פון די אנפראגעס וואס איך באקום איז וואס דער פארום איז, און אויף וואס עס איז געשטעלט. איך וועל דא דעריבער מעתיק זיין וואס עס שטייט דארט אינעם אשכול "ברוכים הבאים".
(צו זעהן בכלליות די פארומ'ס אויף "רפואה ובריאות" ווי אחיעזר ערשיינט אויף די ליסטע דריקט:
http://hydepark.co.il/hydepark/default.asp?cat_id=12)
דער פארום האבן מיר געגרינדעט נאכן גרונטליך אנאליזירן די תוצאות וואס וועט ארויסקומען דערפון!, דער פארום וועט איבערהויפט נישט זיין קיין פארום פון זיך דורכשמועסן איבער נייעס און געשעהנישן, דא וועט מען זיך ארויסהעלפן איינער דעם צווייטן, און "נאר" ארויסהעלפן.
יעדע הודעה וואס וועט ענהאלטן א נאמען פון א געוויסע חסידות וועט גלייך אויסגעמעקט ווערן, די זעלבע וואס וועט ענהאלטן סיי וועלכע נייעס וואס אנבלאנגט נישט איןדי קאטאגאריע פון ארויסהעלפן אידן.
צו רעפלעקטירן וואספארא צורה דער פארום וועט האבן, וועלן מיר דאס מדמה זיין צו די "מעלות", א אויסגאבע וועלכע שיינט ארויס צווישן פילע אויסגאבעס צוליב איר אייגנארטיגקייט פון לאזן ערפארענע מענטשן זיך דורכשמועסן און ארויסהעלפן אנדערע אין אלע ענינים, אזא צורה וועט אי"ה אונזער פארום דא טראגן. מיר ווילן דאס בעזה"י מאכן אויפן העכסטן ניווא וואס שייך. דער פארום וועט אי"ה אריינגיין אין מסורת און ווערן פרטי. אזוי וועלן מיר בעזה"י קענען האבן די פולסטן קאנטראל און גלייך חוסם זיין איינער וואס איז נישט דא צו העלפן נאר צו ליינען יענעמ'ס צרות.
עס איז איבעריג צו באטאנען אז סיי ווער עס וועט דערמאנען לרעה א הודעה אדער א שרייבער פון א הודעה -אין א אנדערע פארום, וועט גלייך נחסם ווערן און וועט מער נישט קענען צוריקקומען דא.
האט איר עצות אויף בעטנעצן?, פראבלעמען מיט אייער קאמפיוטער?, קראנהייטן ביי אייערע קינדער?, עס זענען דא גענוג וואס האבן עקספיריענס אין די זאכן!, איר שעמט זיך נאר -אדער איר זענט פויל- צו גיין צו אנדערע!.
דא וועט איר קענען מיט א רואיגע געמיט וויסן אז:
=אייער פראבלעם און עצות וועט געליינט ווערן דורך אנדערע וועלכע ליידן אויך דערפון.
=איר וועט מעגליך באקומען א גאר פראקטישע עצה פאר אייער פראבלעם.
=אייער הודעה וועט בשום אופן שבעולם נישט אויסגעניצט ווערן קעגן אייך אין סיי וועלכע אנדערע פארום, און זיכער וועט איר נישט קריטיקירט ווערן.
=איר וועט זיך מעגליך קענען פערזענליך פארבינדען מיט אנדערע וועלכע ליידן אויף אייער פראבלעם, דורך זיך דורכשמועסן אין תיבה אישית. און מעגליך אויך זיך קענען רואיגערהייט אידענטיפיצירן פאר יענעם.
אלזא, קומט זייט מהנה אנדערע אין א ערנסטע פאליטיק-ריינע אטמאספערע!, אין א געשמאקע היימישע אטמאספערע!.
לטובת הציבור: א ניק וואס וועט נישט שרייבן אינעם פארום פאר צוויי - דריי וואכן אין א ציה, וועט נחסם ווערן אויטאמאטיש. ווארום דא איז א פלאץ צו העלפן אנדערע און נישט צו זעהן וואס אנדערע מאכן אלץ מיט!.
עס איז זעלבסטפארשטענדליך אז די בעסטע זאך וועט זיין אשכולות אויף ספעציפישע ענינים, וו.צ.ב.ש. איינער קען זיך אויס גוט אין אויגן פראבלעמען זאל ער/זי עפענען א אשכול מיטן אנטראגן אז ווער עס האט א שאלה אין דעם ענין זאל זיך שפירן היימיש צו פרעגן, און איר וועט ענטפערן.
ווי אויבנדערמאנט איז דאס נישט קיין פלאץ פאר סיי וועלכע אנדערע ענינים, יהיה מה שיהיה, אפילו תורה'דיגע חקירות און נייעס איבער חסידות'ן קרייזן, אדער בכלליות'דיגע נייעס וואס איז נוגע גאנץ כלל ישראל.
לטובת הענין פלאנען מיר פון אנהויב צו פאררעכטן תגובות אויף א שיינעם אופן, ד.ה. יעדע ענטפער מוז זיין מיטן גרעסטן מאס רעספעקט וואס שייך צום פריערדיגן. דעריבער וועלן מיר פון אנהויב פאררעכטן יעדע תגובה וואס איז נישט געשריבן מיטן פארלאנגטן רעספעקט...
א ניק וואס דער נאמען דערפון איז מצער סיי וועמען וועט נישט טאלערירט ווערן!
איש את רעהו יעזורו ולאחיו יאמר חזק!.